ميكانيكى القلوب - احمد البحيري المغني الميكانيكي لانباء بلدنا

ميكانيكى القلوب - احمد البحيري المغني الميكانيكي لانباء بلدنا

 

 


كتب : احمد سمير

الفن ملوش مقاييس وبالاصرار والعزيمه بتوصل للي عايزه ومش لازم تبقي ابن مغني أو حد مشهور عشان تعمل للي بتحبه أو تتشهر

أسمي

احمد توفيق عبدالونيس

الشهره المعروف بيها

احمد البحيري المغني الميكانيكي

لقبوني

ميكانيكي القلوب

 عندي موهبة الغناء

من وانا صغير في تالته ابتدائي

وشغال من وانا في تالته ابتدائي لي ظروف المعيشه

كنت بطلع السوق ابيع حلاوه وغني للزباين

 فضلت علي النظام ده لحد أولى اعدادي مكملتش دراسه لي ظروف المعيشه ومشيت لي وحدي ساعتها من المنوفيه علي القاهره  كان عندي ساعهتا حوالي 12 سنه

 القاهره تحديداً

13 درب الكتاب حارة اليهود

اشتغلت شيال

الزباين كانت تنزل تتسوق بضاعتها وانا اشيل في الي كان بيديني 5 جنيه و 10 جنيه فضلت شغال شيال 3 شهور

 بعد 3 شهور في نفس المكان في راجل محترم اسمه الحاج محمود عادل  والحاج محمد عادل   صاحب شركة ضجة للأكسسورات الحريمي

شغلني معاه وجابلي لبس جديد بدل الهدوم الي كانت عليا ويعتبر هوا الي رباني

 وجوزني

 كنت لما بخلص شغل مش بلاقي مكان انام فيه  علي حسابه

 في عماره في نفس المكان اسمها عمارة اللبان

 فيها مدخل كنت بفرش كراتين انام عليها

 فضلت علي الحال ده لحد لما خلصت جيش

 ساعتها قررت اكون جمب عيلتي رجعت المنوفيه اشتريت تروسيكل بالقسط وبقيت اطلع اشتغل في السوق ابيع فورش وامشاط وتوك كنت بصحى الفجر وارجع الساعه 2 الظهر سبب معرفتي للميكانيكا

 التروسيكل كان بيبوظ مني اروح اصلحه عند الاسطى كريم طبعاً اتصاحبت علي كريم وبقينا اخوات بقيت اروح ققعد معاه في الورشه حبيت الميكانيكا عشان كريم

 نزلت اشتغلت معاه في الورشه

اروح الصبح السوق وبعد لما ارجع من السوق اطلع الورشه اشتغل

 طبعاً طول مشواري الي حكايته لحضرتك في كل مكان كنت فيه كنت بغني وانا شيال بغني وانا في محل الاكسسوارات بغني وانا في الجيش بغني في السوق بغني

 كنت شغال ومتغرب وبنام في الشارع وبفكر في حلمي الغنا

 وكنت بروح لي بتوع مزيكا عشان اتعلم المقامات الموسيقية

 جه كريم وانا في الورشه قالي تعالي اصورك فيديو وارفعه ع التيك توك

 قولتله لأ كذه مره

 عشان كنت بعافر طول عمري ومش بوصل ففقدت الامل مصمم قالي هصورك وإن شاء الله ربنا هيكرمك

 الحمدلله صورت فديو بسيط وانا في الورشه غنيت يا بختك يالي صاحي الليل بتاعت النجم جورج وسوف

 الحمدلله هنا كانت الانطلاقة

 جابت 5 مليون

 الجمهور عرفني ولقبوني

ميكانيكي القلوب

احمد البحيري المغني الميكانيكي

 وبقيت اطلع افراح والناس عرفتني بعد مكان محدش عارفني ولا موهبتي وصلت لحد





اكتب تعليق

أحدث أقدم