أنباء بلدنا

 

كتب : احمد سمير

فى لقاء لموقع انباء بلدنا مع موهبة على الطريق ميادة علوانى وتركناها تتحدث عن نفسها فقالت

انا ميادة محمود علواني واسم الشهره او الاسم اللي معروفه بيه هو مي علواني الشهر الجاي هكون كملت 23 سنه طول عمري من وانا طفله اهلي بيدعموني جدا نفسيا معنويا كل حاجه وديما شايفين اني هبقا حاجه كبيره في يوم من الايام كنت مش عارفه انا عايزه ايه بالظبط ومتلغبطه في فترة الطفوله والمراهقه كل يوم بحلم بحاجه مختلفه ومصدقها لحد ما اتمنيت اكون ممثله ومشهوره والناس بتحبني وشايفين اني شاطره بس كنت حاسه انه مستحيل وصعب جدا ولازم تنازلات مثلا او اني اكون بنت حد مشهور لحد ما في يوم والدي اتوفى وكانت اول واكبر صدمه في حياتي يعني ايه موت انا بحبه اوي وحشني طب هعمل ايه هعيش ازاي من بعده هو سندي والدعم بالنسبالي اكتر حد بيشجعني وبيحبني اكتئبت فتره لدرجه مش كويسه وجبت مجموع مش كبير في الثانويه بسبب اني كنت في اسوا فتره في حياتي كلها دخلت الجامعه كليه اداب قسم اثار يونانيه ورومانيه لان فيها قصص وتاريخ وخيال انا حابه ادرسه جدا ومع نهاية الترم الاول اتعرفت على ناس ممثلين مسرح وهنا افتكرت حلمي واستاذنت والدتي اني اشارك وكده واتعلمت منهم وقفة المسرح والحاجات الاساسيه في ورشه مجانيه بسيطه وكنت حابه الموضوع جدا لدرجه اني اثرت في دراستي ومدخلتش امتحانات الترم التاني لاني وقتها قررت اقدم معهد فنون مسرحيه وابقا فنانه بجد واحقق حلمي وهدفي وعرضت عرض وكنت لسه مش قد كده بس كنت مبسوطه اوي مع ان الجمهور كان بيسقفلي مجامله يعني مكنتش هايله ولا احسن حاجه ومحدش يعرفني اصلا المهم روحت اخدت ورشه مع استاذي الفنان محمد البياع وقبلها كنت اخدت ورشه مع استاذي الفنان والمخرج سامح رخا في مركز فنون الجامعه واستفدت جدا من الورشتين دول قدمت لاختبارات المعهد وللاسف ما اتقبلتش قررت ارجع الكليه تاني ومقدمش للاختبارات مره تانيه واني اسيب المسرح خالص وكنت زعلانه بس بعدها ما قدرتش ابعد كتير دي الحاجه اللي بحبها وده شغفي وهدفي الاول والاخير اني امثل والناس تكون مبسوطه بيا وفعلا رجعت اشتغلت ومسرح وعدت السنه في الكليه طبعا ورجعت مركز فنون الجامعه اللي كان احلى حاجه عملتها من اول ما دخلت مجال المسرح وكان خطوه مهمه جدا اتعلمت واستفدت اوي على المستوى الفني وبقى عندي ثقه في نفسي الحمدلله وكونت اصدقاء كتير او اخوات لانهم فعلا قضيت معاهم اسعد ايامي وعرضنا عرض جميل جدا واخدنا جايزه افضل عرض جماعي بعدها اشتغلت عروض مدرج وبعدين اشتغلت عرض في كلية اداب شاركنا بيه في مهرجان حور للفنون تبع الجامعه واخدنا جوايز كتير وكنت بلعب دور البطوله لاول مره في حياتي وكنت مبسوطه اوي بشخصيتي الملكة زينب الزباء من عرض ارض لا تنبت الزهور واترشحت لجايزه افضل ممثله اولى على مستوى الجامعه وده كان شرف كبير ليا وجايزتي الحقيقيه كانت في نظره الناس ليا وتصقيفهم وشكرهم ليا واهم حاجه كانت شرف كبير ليا ان المخرج اللي كنت نفسي اشتغل معاه اشاد بيا جدا وقالي انتي كنتي قد التحدي بشكره جدا اتعلمت منه كتير الفنان احمد اسامه حسنين استاذي وصديقي اللي اشتغلت معاه كتير واتعلمت كتير وبعدها اتعرض عليا اشتغل نوادي لاول مره 3 مخرجين كلموني عشان اشتغل معاهم في نفس الوقت والادوار كانت مساحتها حلوه جدا اختارت اشتغل في العرض المناسب ليا والفريق اللي برتاح في الشغل معاهم وكنت مخرج منفذ لاول مره وممثله دور مش كبير وفعلا استفادت كتير اوي من التجربه دي ووقتها كنت شاركت في مركز الفنون كورال تبع الجامعه عشان حابه انمي موهبة الغناء اللي عندي بسيطه عشان تساعدني في الاداء الغنائي في العروض المسرحيه وكنت بقرا كتير نصوص سرحيه وكتب عن المسرح القرايه فعلا مهمه جدا واشتغلت مسلسل العقرب على اليوتيوب شخصية غادة وكانت تجربه مهمه وممتعه جدا واسهل كتير من المسرح واشتغلت اسكتش يوتيوب كوميدي وبعدها اشتغلت في شريحه المحموديه عرض انف ليله وليله شخصية نيفو وده كان تحدي كبير بالنسبالي لاني استلمت الدور قبل العرض ب 4 ايام والدور كان مهم ومش صغير محتاج شغل واستعرضات وحركه وحفظ وتمثيل في وقت قليل جدا والحمدلله كنت قدها وكله كان بيصقفلي بجد وفرحانين من قلبهم واتعرفت على فنانين وبقينا اصدقاء وكانت من احلى التجارب الممتعه والكوميديه واللي الجمهور حبني فيها وبيتصوروا معايا وحتى الاطفال حبوني اوي ودي اكتر حاجه خلتي مبسوطه وفخوره اوي اني وصلت للمرحله دي من حب الناس بكل الفئات العمريه وبدات اتعرف من ناس كتير في مجال المسرح والكورال والجمهور كمان بقوا عارفني وبيسلموا عليا ودي حاجه كبيره اوي بالنسبالي اتمنى اكون فنانه شاطره ونشيطه ديما في شغلي وعند حسن ظن المخرجين والجمهور واهلي الحمدلله اتكمرت من عميد كلية الاداب جامعه دمنهور دكتور محمد رفعت في حفله كبيره وتقدير فرحني اوي واتكرمت من وزارة الشباب والرياضه بشهادة  من  الوزير اشرف صبحي بشكر الدوله جدا باهتمامها بالفن في الجامعات وبشكر كل اللي دعمنى حتى لو بكلمه حلوه او تشجيع اتمنى الفتره اللي جايه مسلسل العقرب الجزء التاني ينجح لاني بصور حاليا واتمنى اشتغل مسرح تاني قريب لانه وحشني جدا خشبة المسرح والجمهور احب اشكر جدتي ووالدي الله يرحمه يارب وامي واخواتي  لانهم الدعم الحقيقي  واحب انصح اي حد كبير او صغير انه يعمل الحاجه اللي بيحبها ويحاول يحقق حلمه بكل الطرق المناسبه من غير ما يجي على دراسته او شغله لان ده مهم جدا واي حد حابب يدخل المجال ما يخافش في ناس محترمه وبتقدر الفن ومش لازم اي تنازلت حدودك انت اللي بتعملها للناس ومحدش يقدر يتعداها اكتر حاجه حلوه وهتفيدك الجامعه والقراءه والعلاقات الكويسه في المجال اتعب وما تكسلش وما تزهقش كلنا مرينا بمراحل ضعف صعبه ومكناش قادرين نتحمل بس كمل لان طعم النجاح حلو اوي صوت تصقيف الجمهور ليك وتصفيرهم حلو اوي  في النهايه انا بتمنى الخير لكل مجتهد وكل فنان في مجاله وكل مبدع في شغله دمتم مبدعين دائما يارب