 |
البحيرة : مريم بشير
نال مسلسل فاتن امل حربي اهتمام الكثيرين وذلك لاهتمامه بمناقشة القضايا المجتمعية التي تعاني منها السيدات والمشاكل الزوجية التي تعرضت لها شريحة كبيرة من السيدات والتي تقرر بسببها الانفصال للقضاء على هذه المشكلات لكنها تتفاجأ أنها تواجه أزمات أخرى .
في الآونه الأخيرة ظهرت فتاة تدعي ( د - م ) في محافظة البحيرة مدينة دمنهور تتشابه قصة حياتها بشكل كبير مع أحداث مسلسل فاتن أمل حربي و صرحت الفتاه بحجم المعاناه التي عاشتها و التي تقرر بسببها رفع دعوي الطلاق للضرر ضد ( ر - ح ) و المشاكل التي تواجهها مع المجتمع و روت القصة كاملة ( انا عيشت طفولة غير سوية اب وام غير متفاهمين اب متزمت ومش شايل مسؤلية بناته وام كل همها بناتها وازاي تكبرهم وتصرف عليهم .. كنا ٣ بنات الاب مستهتر ماشي وراء نزواته وعايش حياته لنفسه وبس .. والأم غلبانة عايشة عشان بناتها ومش قادرة تتكلم ومش قادرة تسيبهم وتمشي خايفة عليهم..كبرت جوايا خوف من ابويا وكره لحياتي وعايزة اخلص منها بأي طريقة.. كنت عايزة أهرب من حياتي المخيفة واروح مكان تاني اتقدملي جوزي أبوعيالي ووافقت عليه عشان نفس السبب ورميت نفسي فحياة تانية أصعب من الأولي..كان شخص أناني عديم الشخصية مش بيحب غير نفسه ومتطلباته الشخصية ..كنت وقتها لسه صغيرة مخلصتش كلية معرفش يعني ايه متطلبات الست الشخصية ..واما فات الأوان وفهمت كان خلاص فات الوقت وبقي عندي لا مبالاة ..أنجبت بنتين و ولد و صبرت عشانهم زي امي ماصبرت زمان عشان تربينا ..كنت عايشة غصب عني في ذل وقهر وضرب ومش قادرة اتكلم عشان ماليش مكان اروحله..يعني صابرة عشان مرجعش لذل وقهر وسيطرة ابويا..جيت علي نفسي كتير عشان خاطر أولادي ..لكن لكل إنسان طاقة والطاقة بتاعتي خلاص خلصت جاني اكتئاب نفسي وحاولت انتحر بس أولادي كانوا قصاد عيني وربنا نجاني عشانهم .. بعد 17سنه جواز قررت انفصل ومش انا السبب لأ ده جوزي اللي كان وصل لدرجة من التخلف في العلاقة ما بينا ..كرهته وكرهت نفسي وكرهت كل حاجي وقولت اعيش اربي عيالي وخلاص وهو يتجوز ومش عايزة منه غير يصرف علي عياله واكون معاهم عشان ماليش مكان غير مع اولادي ورفض وتطاول عليا كتير واستهتر بكلامي واستهزأ بيا و مكنتش عاوزة اقول لأهلي علي اللي بيحصلبس هو زاد فيها اكتر واكتر وعرف اني ماليش حد وبقيت انضرب واسكت وفالاخر طردني ولقيت نفسي باخد أولادي وبرجع بيت اهلي اللي كنت بكره الرجوع ليه ..بس غصب عني هروح فين؟ وتدخل كتير من الأهل في الاصلاح ما بينا لكن فشلوا عشان جوزي كان ابن اخته يعني مش بيعمل حاجه غير بمشورتها وهي كانت مش بتحبني مع اني كنت بعاملهم بمايرضي ربنا ..بس هي مكنتش سايباني فحالي كانت بتدخل بكل حاجه و هو مكنش بيعمل حاجه غير اما يقولها بعد ما وقفت جنبه في ظروفه واخد دهبي وكل اللي معايا وخرجت من عنده من غير ولا شئ و هو اختار اخته وباعني انا واولاده بعد عشرة17سنه ..اخته خربت بيتنا وبوظت حياتنا و اضطريت ارفع قضية طلاق للضرر واشتغلت عشان اصرف علي أولادي بس كنت عايشه في بيت اهلي ..طبعا ابويا معجبهوش الوضع قالي لوهتطلقي يبقي عيالك ترجع لابوهم انا مش بربي عيال حد ..لكن انامستحيل اعيش من غير اولادي قولت لابويا يستحملنا شوية لحد ما ظروفنا تتظبط بس للاسف ماصبرش علينا وطردنا من بيته و لقيت نفسي في الشارع انا و عيالي ..قعدت عنداختي أسبوع ودورت علي سكن يكون مناسب لظروفي والحمد لله لقيت ..اخدت شقة صغيرة عشان ظروفي واشتغلت ليل ونهار عشان اعرف اعيش اناوالعيال وكمان امي جات عاشت معايا عشان متسبنيش لوحدي..اتحكملي بالطلاق ونفقةالاولاد لكن كلها أحكام علي الورق و امتنع عن دفع النفقة لاولاده و نفقتي انا كمان واتحكم عليه بقضية تبديد للعفش بتاعي وعليه حكم حبس بس هو عايش عادي وانا بشتغل ليل نهار عشان اكفي مصاريف سكن ومدارس ودروس ولبس واكل وشرب وبقالي سنتين ونص شايلة كل ده لوحدي بس ربنا موجود )
ما بين المسلسل و الواقع الضحية أنثي تقرر الهروب من واقع أليم لتتفاجأ بعذاب أكبر .
إلي متي ستظل المرأة ضحية مجتمع ذكورى منصف للرجل !
إرسال تعليق