كبسولات نفسية
كتبت د/غادة حجاج
هو الاختلاف في الطبائع ممكن يقتل الحب؟
معتقدش أبدًا إن الاختلاف هو اللى بيخلى الحب يخلص.لكن اللى بيحصل إن لما تيجى تعمل حاجة مش على مزاج شريكك أو عكس طبيعته،زى انك تكلمى صاحبة هو مابيستظرفهاش فتلاقى وشه قالب، وتوصلك رسالة انك بتعملى حاجة غلط.
أو لما ييجى يخرج يلعب بلاى ستيشن مع صحابه فيرجع يلاقيكى ضاربة بوز فتوصله رسالة أن كل مرة هيخرج هيرجع يلاقى النكد مستنييه.
شوية بشوية الشريك اللى بيتحط فى كورنر المذنب عشان سلوك هو أبسط حقه بيبقى قدامه نمط من تلاتة:
1: يعمل الحاجة من ورا شريكه أو فى غيابه او يكذب وساعتها كده مابقتش علاقة صحية كل واحد فيها قادر يبقى على طبيعته ويمارس حقوقه.
2: يعملها ويستحمل قلبة الوش ويطنش البوز ويتحمل الشعور بالذنب اللى بمرور الوقت هتقل حدته، وساعتها برضو العلاقة بقت علاقة ابتزاز عاطفى يقابله تجنب وتجاهل من الطرف الآخر.
3: مايعملهاش ويشترى دماغه من كل ده ويكبت رغباته ويتخلى عن حقوقه وساعتها هيلاقى نفسه مابقاش هو، بقي شخص آخر متفصل على هوا الشريك ورغباته.
وفى التلات حالات لما الانسان بيبطل يبقى مرتاح في العلاقة ومطمئن لرد فعل شريكه ازاء اختلافه بيذبل الحب.
الحب بيموت مش عشان فيه اختلاف.لكن عشان مفيش قبول واحترام للاختلاف ده.
إرسال تعليق