بقلم ولاء الديب
و الله الناس كلها محتاجه المناداه بالضمير الحي ، مش كده ؟!
عشان الناس تقدر تعيش مع بعضها.. مش كل اللي بيبيع أو بيزرع او يورد.. يكنز الحاجه لحد ما الاسعار تزيد و الضيق يزيد بالناس؛ لأ و كمان الحرب بين روسيا و أوكرانيا و الصراع بين اليابان و كوريا ، مما ينذر بالأسوء.. فالدنيا مش ناقصه جشع التجار ، ده زمان كانوا بيقولوا عمار يا مصر ، فين البركه بتاعت زمان فين الجدعنه فين ولاد البلد ، دلوقت الواحد لو جه جاره يستلف منه بصلايه هيقولك ايه العفن ده ما يشترى لنفسه و الدنيا اتقل خيرها !!
كله بقى معتمد على ان الحكومه هي السبب و هي الحل ، طب ماشي يا عم انا معاك ان الحكومه لازم تزود المجمعات الاستهلاكية و تحارب جشع التجار وان احنا اكتر من 100 مليون و محتاجين دعم اكتر من الحكومه ، طب انت مثلا اسرتك 4 أو 5 أفراد و عايشين في شقه اوضتين و بتاكلوا و تلبسوا مش احسن حاجه...، طب عمرك جه على بالك ان فيه اللي مش لاقى مكان يتعالج فيه، لقمه تسد رمقه، لبس يحميه من التلج او سقف يغطيه ؟!
الحكومه اللي انت طول الوقت تشتكي منها خلاص قدمت السبت ..و ده دورك عشان تقدم معاها الحد ...
لو كل واحد مننا فكر أنه صحي من نومه شرب ميه نضيفه و فيه غيره قبل حياه كريمه كان بيشربها تجيب العله ، لو فكرت انك بتتنفس هوا زي ما ربك خلقه عليل و فيه غيرك قبل اتحضر للأخضر كان بيتنفس عوادم مصانع و سيارات ...و غيرها كتير ؛.. كهربا منتظمه ، شوارع و مستشفيات و مصانع و استثمارات... ولكن يبقى السؤال؟! هي الحكومه مهما عملت هتعمل ايه في قلة الخير و البركه بين الناس؟!! .. ارحموا ترحموا و حاسبوا أنفسكم قبل أن تحاسبوا .... و عمار يا مصر ! .
إرسال تعليق