ومش فارقة...... قصيدة للشاعر محمد الشرقاوي




ومش فارقة

تكون الغدوة يوم لحمة

وفرخة كبيرة مشوية

ولا فارقة

تكون جبنة

وحبة فول وطعمية

ولا فارقة 

تكون لابس هدوم ماركات

وتحلف إنك ابن ذوات

وتتباهى بجدك سين

عشان ساب لك هنا عقارات

ومش فارقة 

يكون عندك فلل وقصور

تصيف كل شهر شهور

وسيارة وطيارة

ويخت يشق موج وبحور

ولا فارقة

يكون لك في البنوك حسابات

وتكتب كل لحظة شيكات

وتعمل صفقة بالتليفون

تطول منها كتير عمارات

ولا فارقة 

يكون لك صحبة بالملايين

وتتظاهر سنين وسنين

بكل الحب والإخلاص

لكن قلبك جراح وأنين

ومش فارقة

تكون حاصل على شهادات

وتتصور على القنوات

وصبح وليل بتنصحنا

وفي عيونك كتير ظلمات

وتزرع بالفجور فدادين

وتجمع بالنفاق ملايين

يعدي الموت قصاد عينك

ومش قادر تتوب يا حزين

ومش فارقة

سنين العشرة وياهم

لأن الدنيا طاحناهم

تشوف البسمة بتعافر

وبحر الدمع جواهم

قصص في الهم مكتومة

عيون تايهة ومحرومة

طواها الصمت وربطها

وخايفة تئن مظلومة

ومش فارقة

تكون فارس في قلب بنات

وتكتب شعر أو روايات

تكون النجم في الإعلان

وطول وقتك مع الكاميرات

وبين اللحظة واللحظة

تحس الهم

وتاكل لقمة تلقاها

بطعم السم

ومش فارقة

تكون منصب عظيم ورفيع

وحاسس إنه سد منيع

ودعوة فجر من مظلوم

تشدك للمحن وتضيع

تسيب الدنيا للوارث

وتحصد حزن وكوارث

وكيف هترد ع الباعث

وفعلك كان بجد شنيع

وفي الآخر هقول كلمة

هتفضل في الزمن حكمة

سلامة قلبك احفظها

رضا الرحمن أكيد نعمة

وفوض للكريم أمرك

هيجبر في السنين خاطرك

ويجعل خطوتك للخير

يوسع في المدى قبرك

لأن الدنيا لو طالت

بجد بجد مش صادقة

ومش بسهولة تتغير

ولا ممكن

تكون فارقة

اكتب تعليق

أحدث أقدم